شونگال

ماہتاک بلوچی زند ءَ چھاپ ءُُ شنگ کنگ ءَ پیش من بازیں نامانی سرا پکر کرت۔ اے بابت ءَ من گوں بازیں سنگتاں ھم صلاح ءُُ سوج کرت کہ ماہتاک ءِ چہ نام ایر کنگ بہ بیت تہ دوست ءُُ سنگتاں بازیں صلاح ءُُ سوج دات۔ بلے اسلام آباد ءَ رجسٹریشن ءِ مسئلہ اَت کہ اودا Gender نام ءَ تاکے چھاپ بوت۔ بلوچستان ءَ کسےءَ گندارے نام ءَ تاک ءُُ ماہتاک ءِ باروا درخواستے دات تہ آ رد کنگ بوت کہ اے تاک ماہتاک یا روتاک پیش ءَ است۔ بلے جینڈر ءُُ گندارءِ تہا شپ ءُُ روچ فرق است انت۔ بلے گندارے Gindar ءُُ Gender ءِ Spellingیک وڑا انت۔ اے باروا یک روچے واجہ صبادشتیاری ءَ یونیورسٹی ءِ درچکانی چیرابازیں نام آئی بحث ءُُ ترانے بوت گُڈسرا ماں بلوچی زند ءِ نامے ءِ سرا تپاک کرت۔
ماہتاکءِ نامے گچین کنگ ءَ پد وھدے من ڈیکلریشن ءِ واستہ ڈی سی چاغی ءَ درخواست دات۔ کہ آ سرپد نہ بوت کہ تاک ماہتاک ءُُ اخبارآنی ڈیکلریشن چہ چیزے انت۔ ڈی سی چاغی ءَ منا سک وار ءُُ بزّگ کرت مُدام یک کاگدے لوٹت۔ بہرے پریس آرڈینس ءَ لوٹت ءُُ بہرے دگہ کاگدے ڈیمانڈ کرت۔
بلے من مُدام آئی گورا شُت۔ اے نیام ءَ بازیں ماہ گوست اَنت تہ من واجہ حکیم بلوچ ءِ گورا شُت کہ آ بلوچستان ءِ چیف سیکرٹری ءِ منصب ءِ سرا کار ءَ اَت۔ من آئی ءَ گُشت واجہ منا نوشکی چاغی ءَ چہ ماہتاک ءِ ڈیکلریشن ءِ مسئلہ انت ڈی سی ڈیکلریشن دیگ ءَ نہ اِنت۔ آئی ءَ گُشت من انوں ڈی سی کوئٹہ ءَ فون کنیں آ ترا انوں ماہتاک ءِ ڈیکلریشن دنت۔ من گُشت واجہ منی دلی واھگ انت کہ من وتی پِس ءُُ پیروکی علاقہ نوشکی ءَ تاکے دربکناں گہتر انت۔ آئی ءَ وتی پی ایس ءَ گُشت نوشکی ءِ ڈی سی ءَ ملائین۔ پی ایس ءَ ڈی سی ءَ ملائینت۔ واجہ حکیم بلوچ ءَ نوشکی ءِ ڈی سی ءَ گُشت کہ یار محمد بادینی ءَ چنت ماہ پیش ماہتاک بلوچی زند ءِ حاترا درخواست داتگ تہ ایشرا ڈیکلریشنءِ زُوت بدئے۔ ڈی سی ءَ او کرت بلے پدا من مدام ڈی سی ءِ کرا شُت آئی ءَ منا ریپینت دو ہفتگ گوست من پدا چیف سیکرٹری ءِ کار گس ءَ واجہ حکیم بلوچ ءِ کار گس ءَ شُت آئی ءَ منا جُست کت کہ تئی کار بوت من گُشت واجہ ڈی سی منا ریپینگ ءَ انت آئی ءَ وتی پی ایس ءَ گشت کہ ڈی سی نوشکی ءَ فون ءَ ملائیں۔ چیف سیکرٹری ءِ پی ایس ءَ وھدے گوں ڈی سیءِ پی اے ءَ گپ کرت آئی ءَ گُشت کہ ڈی سی کوئٹہ ءَ شُتگ۔ واجہ حکیم بلوچ زار گپت آئی پی اے ءَ گُشت کہ آ کئے اجازت ءَ کوئٹہ ءَ شُتگ۔ بگشے زوت منا فون بکنت۔
واجہ حکیم بلوچ ءِ ترند ءُُ ترشپیں لوزانی پد ڈی سی نوشکی ءَ ماہتاک بلوچی زند ءِ ڈیکلریشن جاری کرت۔ ڈیکلریشن گرگ ءَ پدوھدے من ماہتاک ءِ کار بندات کرت کہ خضدارے سنگت لعل جان بلوچ ءَ منا یک کمپیوٹرے دیڑوءِ وڑا دات۔ چیزے ماہ اے کمپیوٹرے سرا ماہتاک بلوچی زند ے کار کرت۔
رند ءَ لعل جان ءِ بچ ءَ وتی کمپیوٹرپدا بُرت۔ دیڑوھماچیز ءَ گُش انت کہ سیاد ءُُ وارث بہارگاہ ءِ وھد ءَ مردم وتی دوست سنگت ءُُ سیاد ءُُ وارثاں زاتگیں بُز ءُُ پس داینت۔ تنکہ آ چار پنچ ماہ بُوز ءُُ پس ءِ شیراں بور انت۔ ءُُ پدا پس ءُُ بُز ءَ گوں شنک ءُُ گورگ ءَ واھند ءَ سر کن انت۔
چیزے وھد گوست کہ واجہ سید فصیح اقبال یک روچے منا فون کرت کہ من تئی کار گس ءَ کائین چیاکہ آئی ءَ ماہتاک بلوچی زند ءِ آزات جمالدینی، بابو عبدالکریم شورش، یوسف عزیز مگسی، ملک محمد پناہ، غلام محمد شاہوانی ءُُ دومی خاصیں تاک دیستگ اَت۔ بیگاہ ءِ وھد ءَ تولہ رام روڈ کوئٹہ بلوچی زند ءِ کا رگس ءَ واجہ سید فصیح اقبال گوں وتی سنگتے اَت۔ آئر ءَ یک نوکیں کاٹن پیک کمپوٹرے گوں اَت آئی ءَ زند ءِ ادارہ ءَ سوغات کرت ءُُ گشت کہ تہ انچیں فیلڈے درچتگ ایشی تہا مسئلہ ءُُ جنجال باز انت۔ مالی مسئلہ ءُُ جنجالاں ھوار جان ءِ سلامتی ءِ مسئلہ ہم است۔ بلے تہ انّوں حوالکاری ءِ راہ گچین کرتگ بائد انت اے باروا مستقل مزاج بہ بئے ءُُ حوالکاری ءِ پڑ ءَ یک نامے ودی بکن چوشکہ آزات جمالدینی، بابو عبدالکریم شورش ءُُ دومی مردم بوتگ انت۔ واجہ فصیح اقبال تاں دیر ءَ زند ے کارگس ءَ نشتءُُ دیوان ءُُ مجلس کرت۔
صبادشتیاری، حکیم بلوچ، لعل جان بلوچ، فصیح اقبال ءَ پدمن یک دگہ واجہ ءِ نام ءَ مہ گرِاں تہ بے انصافی بیت آ واجہ ڈاکٹر عبدالمالک انت کہ آئی ءَ منا ماہتاک بلوچی زند ءِ چھاپ ءُُ شنگ کنگ ءِ سرا باز دلبڈّی دات۔ آئی زند ءِ کار گس ءَ چہ ماہتاک بلوچی زند ءِ دوکاٹن ماہتاک زرت ہمک ماہ رکشہ ءِ تہا خاران ہاؤس ءَ برت۔ پدا خاران ہاؤس ءَ چہ تربت ءَ سر کرت۔ ماہتاک بلوچی زند ءِ یک کاٹن ءِ ملا احمد دشتی ءِ دکان ءَ پہ بہا کنگ ءَ ایر کرت ءُُ دومی کاٹن فلائٹ ءِ ذریعہ ءَ تربت ءَ چہ مسکت ءَ رادگ کرت۔ اے ہما دورے گپ انت کہ ڈاکٹر مالک بلوچ پیدل اَت سر وزیر جوڑ نہ بوتگ اَت۔
انچو منی کسانیں براس عبدالباری ءِ جہد ءُُ کوشست لکھ ستا کرزیت کہ آئی ءَ اے باروا ھم مزنیں محنت ءِ کُتگ۔ چریشی ابید منی کمپوزر، جہانزیب، محمدیوسف،محمد عباس، عبدالغفار، نظام الدین ءِ کار لکھ ستائے لائق انت کہ آھاں شپ ءُُ روچ کار کرتگ ءُُ ماہتاک زند چھاپ ءُُ شِنگ کرتگ۔ یونائٹیڈ پرنٹنگ پریس ءِ مستر لالہ رفیع اللہ ءِ ھم منت واراں کہ آئی ءَ بلوچی زند ءَ پہ وھد چھاپ کرتگ باز وھد ءَ انچو بوتگ کہ تاں شش ماہ ءَ آئرءَ یک کلدارے نہ داتگ، بلے آئی ءَ ماہتاک بلوچی زند ءَ وھدءَ چھاپ کرتگ۔ انچو الیوسف کوچ واھند حاجی عبدالخالق بادینیءَ ھم افرین انت کہ زند ءِ ہر چنکس ڈاک کراچی ءَ شُتگ آئی ءَ بیست سالے تہا یک کلدارے ھم نہ گپتگ۔
چریشی ابید ماہتاک بلوچی زند ءَ دیما برگ ءُُ بلوچی زبان ءِ کلمکار ءُُ شاعراں ھم من باز منت واراں کہ آھانی مدت ءُُ کمک مدام مارا گوں بوتگ۔ انچو بلوچی زند ءِ ملکی نمائندہانی ھوری در ملکی نمائندہ ھم اے باروا مزنیں کردے پیش داشتگ ءُُ ماہتاک بلوچی زند ءَ تاں وانوکاں سر کرتگ۔ ماہتاک بلوچی زند ءَ گوستگیں بیست سالانی تہا پنجاہ ءَ زیات خاصیں تاک چھاپ ءُُ شنگ کرتگ۔ بلوچ بلوچی ءُُ بلوچستان ءِ ہر سرحالے ءِ سرا شونگال نبشتہ کرتگ۔
ماہتاک بلوچی زند ءِ بیست سالانی تہا یک انچیں پالیسی ءِ بوتگ کہ بلوچ قوم ءُُ راج ھور ءُُ ھوار کنگ بہ بیت بے تپاکی ءَ رکّینگ بہ بیت۔ بلوچی زبان ءُُ لبزانک زندگ دارگ ءِ حاترا جہد ءُُ کوشست کنگ بہ بیت۔ چیاکہ زبان لبزانک دود ءُُ ربیدگ مئے درستانی انت بائد انت ماں یک دومی ءَ ھور بباں۔
گوستگیں بیست سالانی تہا ماہتاک بلوچی زند ءَ ھر وڑیں سکی سوری دیستگ۔ بلے ہر وڑیں مسئلہ ءُُ جنجالانی مقابلہ کرتگ۔ بلے گوستگیں جام حکومت ءِ سرکار ءِ وھد ءَ بلوچستان ءِ حال رسانی ءُُ شنگ کاریءِ وزیر میر ظہور بلیدی بوتگ۔ ماہتاک بلوچی زند ءَ گوں باز نا انصافی بوتگ آئی اشتہار بند کنگ بوتگ اَنت بلے بلوچی زند ءِ مول ءُُ مراد بلوچی زبان لبزانکءِ دیمرئی انت آ ہچ وھد ءَ چہ ایشی چک ءُُ پد نہ بیت۔(شونکار)