ہر کس بلوچ ءُُ بلوچستان ءِ خیرخواہ انت آ بلوچ قوم ءَ تعلیم بدنت: ظفر علی ظفر ؔ…..گند ءُُ نند یار جان بادینی

پجار:پجار: واجہ ظفر علی ظفرؔ سال 1943 ءَ کراچی ءَ ودی بوتگ۔ آئی ءَ وتی بنداتی وانگ ءُُ زانگ چہ کراچی ءَ در برت۔ میٹرک 1969 ءَ پاس کرت۔ رند ءَ سال 1972 ءَ ایف اے ءِ امتحان پاس کرت۔ مزنیں وھدے یو ایس ایس ار ءِ انفارمیشن ڈیپارٹمنٹ ءَ کار کرت۔ واجہ بلوچی زبان ءِ نامداریں شاعرے ھواری ءَ یک وش لسانیں انسانے انت چریشی ابید واجہ سید لبزانکی مجلس ءِ کماش ءُُ فاضل اکیڈیمی ءِ بنیاتی باسکاں چہ یکے بوتگ۔ گوستگیں اپریل2003 ءِ ماہ ءَ ماہتاک بلوچی زند ءِ سر شونکار یار جا بادینی امارات ءِ تر ءُُ گرد ءَ شُتگ ات آئی ءَ ابو دبئی ءَ بلوچی زبان ءِ نامداریں غزل گشیں شاعر واجہ ظفر علی ظفرؔ ءَ گوں گند ءُُ نندے کرت۔ اے گندءُُ نند ءِ احوال دیمے تاکدیمانی سرا دیگ بوتگ انت۔(ادارہ)

بلوچی زند: واجہ ظفر علی ظفرؔ شمے دل ءَ شاعر جوڑ بوھگ ءِ حیال چون پیدا بوت؟
ظفر علی ظفرؔ: کراچی ءَ وھدے فاضل اکیڈیمی جوڑ بوت۔ سال 1966 ءَ صدیق آزات ءَ فصیح اقبال ءِ پانزدہ روچی اخبار روزنامہ بلوچی چہ کراچی ءَ کشگ شروع کرت۔ من ہمے زمانگ ءَ کالج ءَ وانگ ءَ اتں۔ زمانہ بلوچی ءُُ منی دفتر یک دومی ءَ نزیک اتنت۔ زمانہ بلوچی ءِ دفتر ءَ منی روگ ءُُ آیگ بوت۔ پدا من رشین انفارمیشن آفس ءَ کار ءَ اتن من ءَ آر ٹیکل دوست بوت من آئرءَ بلوچی ءَ رجانک کرت ءُُ زمانہ بلوچی ءَ چھاپ ءُُ شنگ کنائینت۔ رند ءَ مارا پہ زمانہ بلوچی ءِ حاترا مواد ءِ ضرورت بوتگ ات۔ صدیق آزات آڈٹ کنگ ءَ ات۔ کراچی ءَ ہر چنکس شاعر ادیب است اتنت گوں آھان ماں را بطہ کرت بازیں مواد ھم جم کنائینت۔ شاعر آنی رابطہ کنگ ءَ اے فائدہ بوت۔ ما ھوار بیتن ءُُ فاضل اکیڈیمی اڈ کرت۔ سال 1970-71 ءِ گپ انت من یک پربند ءُُ غزلے گشت۔
بلوچی زند: ترا تئی اوّلی غزل ءِ پر بند یات بنت؟
ظفر علی ظفرؔ:
کپوتاں پہ دل ءِ زیم ءَ بچارات
زہیری نالگاں ساعتے بدارت
دراں سنگتاں ءَ اے پربند دوست کرت۔ صدیق آزات ءَ وھدے اے غزل گوش داشت، گشتے کہ کراچی ءَ سی سال ءَ رند یک شاعر ءِ پیدا بیتگ آزمانگ ءَ مراد آوارانی مزنیں نقادے ات۔ آئی ءَ ھم منی پربند باز پسند کرت۔ احمد زہیر ءَ ھم من ءَ باز دلبڈی دات۔ عبدالرحیم ظفر ھما زمانگ ءَ مئے پجی ءَ انفارمیشن ءَ کار ءَ اَت۔ آئی ءَ من ءَ سک دلبڈی دات۔ من وتی اوّلی غزل ءَ فاضل اکیڈیمی ءِ مشاعرہ ءَ ونت۔ رند ءَ غزل باز پاپولر بوت بازیں گشندہاں ایشرا زرت ءُُ جت۔ ایشانی تہا شفیع ستار جھاڑک، فقیر محمد فقیر قندی ءُُ دگہ بازیں ھوار انت۔ چریشی ءَ پد من شاعری بنگیج کرت۔
بلوچی زند:واجہ شاعری ءِ باروا تئی چہ حیال انت، اے خداے داد ے یا ہر مردم شاعر جوڑ بوت کنت؟
ظفر علی ظفرؔ: شاعر قدرتی طور ءَ پیدا بیت۔ شاعر ءِ شاعری ءَ Improve کنگ ءِ واستا آئی ءَ را علم حاصل کنگ لوٹیت۔ ایشی مطلب ایش انت کسے قدرتی شاعر ءِ آ پدا مطالعہ مکنت موانیت اے پیم نہ انت۔ مطالعہ لازمی انت من ءَ کسانی ءَ چہ گوں شاعری ءَ شوق بوتگ۔ من چہ کسانی ءَ کلاسیکل شاعری گوش داشتگ۔ مطالعہ کرتگ ونتگ بلے من شعر نہ گشتگ۔ شاعری ءَ ابید من گوں امروز ءِ بازیں جنجالاں دزگٹاں شاعر ی فرصت ءُُ فراغت لوٹیت۔ شاعری ءِ واستا من قلم ءَ چست نکناں کہ من شعرے نبشتہ کناں وھدے شاعری کیت من نبشتہ ے کناں چہ منی لاپروائی ءَ لہتیں پشت کپیت۔ لہتیں چھاپ بنت لہتیں گار بنت۔
بلوچی زند:واجہ تئی شعرآنی کتاب کدی چھاپ ءُُ شنگ بیت؟
ظفر علی ظفرؔ: ایشی ءَ من نزاناں کدی کیت ءُُ چھاپ بیت۔ منی حیال ءَ تنے وھدی منی شعر جم نہ بیتگ انت۔ دومی پدا من باز کم شعر گشتگ۔ بلکیں منی شعر کتابے نہ بنت۔
بلوچی زند:واجہ تئی پر بستگیں شعرانی تعداد چنکس انت؟
ظفر علی ظفرؔ: کسانیں کتابکے بنت۔ بلے چہ منی نا بودی ءَ شنگ ءُُ شانگ انت۔ من جم نہ کرتگ انچیں دورے بیت من ءَ موہ برسیت من درستاں جم بکناں ءَ چھاپ ءُُ شنگ کناں۔
بلوچی زند:واجہ فاضل اکیڈیمی ءُُ سید لبزانکی مجلس ءِ باروا مار ءَ بگش ایت اے کدیں جوڑ بوتنت؟
ظفر علی ظفرؔ: فاضل اکیڈیمی ھما زمانگ ءَ اڈ بوت وھدے صدیق آزات زمانہ بلوچی ءَ چھاپ ءُُ شنگ کنگ ءَ ات۔مئے آئی دفتر ءَ روگ ءُُ آیگ ات۔ ہمے وھدآں یک مشاعرہ ءِ کرت۔ تنکہ شاعر آنی شعر جم بہ بنت۔ ہمے دوراں ءَ مارءَ ہمے خیال اتک کہ فاضل ءِ باروا ادارہ ءِ اڈ بکنیں۔ دراں سنگت ھور بوتنت فاضل اکیڈیمی اڈ کرت۔ آزمانگ ءَ بلوچی اکیڈیمی سرکاری سرپرستی ءَ قائم بوتگ ات۔ بلوچستان ءُُ کراچی ءَ دگہ ہچ علمی ءُُ ادبی ادارہ نیست ات کہ آ پہ بلوچی لبزانک ءِ حاترا کار بکن انت۔ فاضل اکیڈیمی ءَ رند بلوچستان ءَ جاگہ جاگہ ے ءَ لبزانکی گل ءُُ مجلس جوڑ بوتنت فاضل اکیڈیمی ءَ کار کرت چیزے کتاب چھاپ ءُُ شنگ کنائینت ھما زمانگ ءَ چہ کراچی ءَ بلوچی زبان ءِ حاترا یک تحریک ءِ شروع بوت۔
بلوچی زند:شما سید لبزانکی مجلس کدیں جوڑ کرت؟
ظفر علی ظفرؔ: سید ءِ وفات ءَ رند آئی ھر چنکس کتابانی مسودہ است اتنت۔ آھانی تہا سید گنج ھم ھور اَت سید گنج ءَ بلوچی اکیڈیمی ءَ چھاپ کنگ ءِ حاترا برت۔ مزنیں مدتے ھمودا کپت آھاں چھاپ نہ کرت۔ پدا من سنگتاں ءَ گشت کہ سید گنج ءَ چھاپ کنیں ما ھمدہ ءَ چندہ ءُُ پوڑی کنیں۔ ھمے کتاب ءَ چھاپ کنیں ما کراچی ءَ شت سنگتانی یک دیوانے لوٹاھینت۔ ھما میٹنگ ءَ سید ہاشمی اکیڈیمی ءِ کمک ءِ واستا من سید لبزانکی مجلس اڈ کرت من وت ایشی چیئرمین اتں سید لبزانکی مجلس ءَ سید ہاشمی اکیڈیمی ءَ را باز دلبڈی دات۔ سید ہاشمی اکیڈمی ءَ باز کار کرتگ انگت ءَ کنگ ءَ انت باز شریں اسٹینڈ ڈرڈے کتاب چھاپ ءُُ شنگ کنائینت۔ منی حیال ءَ بلوچی تاریخ ءِ تہا اے وڑیں شریں کتاب تنے وھدی کسےّ ءَ ھم چھاپ ءُُ شنگ نہ کرتگ۔ بلوچی اکیڈمی است ایشرءَ مزنیں گرانٹ ھم رسیت بلے سید ہاشمی اکیڈمی ءِ کتابانی مقابلہ ءَ کس نہ کنت۔ سید ہاشمی اکیڈمی خاص علی عیسیٰ ءُُ جی آ رملا ءَ باز کار کرتگ۔ آھانی ھذمت سہڑاھگ ءِ لائق انت۔
بلوچی زند:انور اقبال ءَ ھما زمانگ ءَ بلوچی فلم جوڑ کرتگ۔ اشکنگ ءَ شما آئی سک مخالفت کرتگ؟
ظفر علی ظفرؔ: من نہ آئی حمایت کرتگ ءَ نہ مخالفت کرتگ آئی تہا یک دگہ مسئلہ ے است ات یک مردمے انور اقبال ءِ خلا ف ات۔ آ بزنس مینے ات آئی نام انوں من ءَ یات نہ انت۔ آ مردے ءَ اے گپ دیما برت جی آر ملا ءَ ھم مخالفت کرتگ۔ چیزے دومی سٹوڈنٹس است اتنت۔ اے باز مزنیں اشوے نہ ات بلے ایشرا مالی ءُُ سیاسی رنگ دیگ بوت۔
بلوچی زند:تئی حیال ءَ بلوچی فلم جوڑ بہ بیت یا نہ؟
ظفر علی ظفرؔ: وختکہ سٹیج بنت، ڈرامہ بنت گڈا پرچے بلوچی فلم جوڑ مہ بنت منی جند ءَ بلوچی ڈرامہ نبشتہ کرتگ۔ انگت ءَ من ءَ فرست بوت۔ من بلوچی ءَ ڈرامہ نبشتہ کناں۔
بلوچی زند:واجہ تئی باروا گشنت کہ تو گشتگے کہ جی آ رملا ءِ زبان سید ءِ نسبت ءَ زیات واناک انت۔ اے گپ چہ ھد ءَ راست انت؟
ظفر علی ظفرؔ: من ہچ چُشیں گپے نہ کرتگ۔ واناک ءِ مطلب چہ انت کجا سید ظہور شاہ ہاشمی کجا جی آ رملا اے ھر دوایناں Compare کنگ ءِ سوال پیداک نہ بیت۔ سید ءُُ جی آ رملا ءِ نیام ءَ زمین ءُُ آسمان ءِ فرق انت۔
بلوچی زند:باز مرد دمانی خیال ءَ نشہ ءَ ابید شاعری بوت نکنت؟
ظفر علی ظفرؔ: نشہ ءَ ابید شاعری بیت۔ شاعری ءِ واستا نشہ ءُُ شراب ضروری نہ انت، نشہ ءِ حالت ءَ کسے شعر گشت نہ کنت۔
بلوچی زند:گڈا شاعر پرچے زیات شراب ورنت؟
ظفر علی ظفرؔ: شاعر ہمے حاترا شراب ورنت کہ آ بازحساس انت آھاں ءَ کسان کسانیں گپ توریت۔ ہمے حاترا شراب ورنت تنکہ آھانی ذہنی پریشانی دور بہ بیت۔
نشہ ءُُ شاعری لازم و ملزوم نہ انت۔ ہمے حاترا شاعر گُشنت سارے جہاں کے درد ہمارے جگر میں۔ شاعر دنیا ءِ تہا ھرچی گندیت ماریت۔ آئرءَ دل ءَ کاریت اے ضروری نہ انت نشہ شاعری ءِ حاترا کنگ بیت ۔
بلوچی زند:سید ءَ وتی تیوگیں زند بلوچی زبان ءُُ لبزانک ءِ ھذمت ءَ گوازینت آئی خاصیں یات ءِ شمارءَ یات بیت؟
ظفر علی ظفرؔ: من گوں سید ءَ باز وھد گوازینتگ سید منی نزدیکیں سنگتے بوتگ۔ سید ءِ یک چیزے است ات کہ ہر کسے ءَ گوں آئی تب نہ لگتگ چہ آئی ءَ Avoid کرتگ۔ سید باز کم مردماں ملتگ کراچی ءَ منا ءُُ احمد زھیر ءَ سید ملتگ ہر کس ءَ گشتگ کہ سید مردم آزادے بلے سید ءِ تب ءُُ مزاج ءَ مردماں سرپد نہ بوتگ۔ ھر آرٹسٹے بیت آئی تہا Contradictionتضاد ضرور بیت۔ ہر آرٹسٹ ءِ تہا شاعر ءُُ قلمکارے زند ءِ تہا تضاد بیت۔
بلوچی زند:بلوچی کلاسیکل شاعری بلوچی لبزانک ءِ مڈی زانگ ءَ بیت بلے اے باروا ھچ کار بوھگا نہ انت؟
ظفر علی ظفرؔ: بلوچستان ءَ بازیں لبزانکی گل ءُُ ادارہ است انت آ تحقیقی کار کنگ ءَ نہ انت۔ آھانی نیام Working Relation نیست۔ ایوکا چار بچک جم بنت۔ لبزانکی مجلس ءُُ دیوان ءِ اڈ کننت شاعری ءَ ابید دگہ ھچ گندگ ءَ نہ بیت۔ فاضل ءِ سرا ریسرچ انوں چھاپ بوھگا نہ انت۔ بائد انت مئے لبزانکی ادارہ بلوچی کلاسیکل شاعری ءِ باروا پکر بکن انت۔ پٹ ءُُ پول بکن انت۔ منی حیال ءَ ایشی بنیاتی سوب علم ءُُ زانت ءِ کمی انت۔
بلوچی زند:واجہ بشیر احمد بلوچ ءَ فاضل ءُُ جام درک ءِ شاعری ءِ باروا باز کار کرتگ؟
ظفر علی ظفرؔ: بشیر احمد بلوچ ءَ مُلافاضل ءِ باروا یک بنیاتی کارے کرتگ۔ ما یک دومی ءَ پرچے بد ءُُ رد بکناں بشیر احمد ءَ جام درک ءِ کتاب ءَ چھاپ کرت، ملا فاضل ءِ کتاب چھاپ کرت۔ بائد انت بشیر احمد ءِ کار دیما برگ بہ بیت۔ فاضل ءِ باروا بشیرا حمد ءَ بید ادگہ کسے ءَ کار نہ کرتگ۔
بلوچی زند:واجہ نوکیں ورنا ایں شاعر آنی باروا تئی چہ خیال انت؟

ظفر علی ظفرؔ: منی حیال ءَ مرچی شریں شاعر گندگ بوھگا نہ انت۔ ہر چنکس شاعر است انت آھانی شاعری ءِ تہا کوالٹی نیست۔ ایوکا وتی حب ءُُ شوق ءَ پورہ کنگا انت۔ انچو میگزینانی شونکار انت۔ پہ دیمیں شاعر آنی شعرآں چھاپ کن انت۔ تنکہ آھانی تاک بہا بہ بنت۔ مروچی ہر چنکس شاعری چھاپ بوھگا انت بے معنیٰ انت۔
بلوچی زند:یک شریں شاعر ءِ جوڑ بوھگ ءِ حاترا بنیاتی چیز چہ انت کہ آھانی سرا کار بندگ بہ بیت؟
ظفر علی ظفرؔ: من ورنایاں شاعری ءِ سوج ءَ بالکل نہ دیاں اگں کسے قدرتی شاعرے آئرءَ کسے چہ شاعری ءَ داشت نکنت آ مردم الم ءَ شاعر ءِ جوڑ بیت شاعری کنت شاعری ءِ حاترا ضروری انت مطالعہ بکں انت بواننت۔
بلوچی زند:واجہ شاعری ءَ ھوار نثر ھم نبشتہ کرتگ؟
ظفر علی ظفرؔ: کوئٹہ ٹیلی وژن ءِ جنرل منیجر عبدالکریم بلوچ ءَ من ءَ گشت کہ تو بلوچی ڈرامہ نبشتہ بکن آئی ءَ من ءَ سندھی ءَ اسکرپٹ ءِ دات۔ من ڈرامہ نبشتہ کرت ءُ راہ دات آھاں زرد ءِ ایمنی ءِ نام ءَ پیش کرت۔ بلے آھاں منی زرّ زرت ءُُ وارت انت من ءَ نہ دات انت۔
بلوچی زند:ڈرامہ ءَ ابید دگہ تو چہ نبشتہ کرتگ؟
ظفر علی ظفرؔ: وھد ءِ من انفارمیشن ءِ محکمہ ءَ کار ءَ اتں فیچر نیوز پریس ریلیز ءُُ مضمون ھم نبشتہ کرتگ ءُُ آھانی ترجمہ ھم کرتگ۔
بلوچی زند:تر ا کجام چیز ءِ گندگ ءَ وشی ءُُ کجام چیزے گندگ ءَ غم بیت؟
ظفر علی ظفرؔ: وھدے من معصومیں زھگ ءِ گنداں کہ آ بچکندگ ءَ انت من ءَ باز وشی بیت۔ اگں زھگ ءِ تکلیف ءِ توک ءَ انت من ءَ باز دکھ ءُُ درد بیت آئی دکھ تاں دیر ءَ منی ذہن ءِ سرا مانیت۔
بلوچی زند:بلوچ قوم ءِ سیاستدانانی وڑا بلوچ قلمکار ھم یک دومی ءَ تپاک نہ انت ایشی سوب ءُُ ھلت چہ انت؟
ظفر علی ظفرؔ: مئے پورئیں بلوچ قوم ءِ المیہ ایش انت کہ مئے قبائلی نظام Mentality بدل نہ بوتگ ءُُ مئے کر ءَ علم نیاتک ایشی بنیاتی سوب مئے جہالت انت تا وھدے جہالت ختم نہ بیت انسان ءِ تہا شعور ءُُ آگہی نہ ایت۔ وھدے مئے اے جہالت ختم بوت پدا امازاناں کہ مئے نپ ءُُ نقصان چہ انت۔ انوں مارءَ انچیں مردم Exploit کنگ ءَ انت۔ سردار ءُُ نوابانی ھواری ءَ ھما زنڈیں مردم است انت۔ چوشکہ میر ءُُ کہدہ انت۔ آ ھم بلوچان ءَ Exploit کنگ ءَ انت۔ چیاکہ ماراوتر از انت نیست۔ ما آھانی رند گیری ءَ کناں یک قبیلہ ے مردماں گوں دومی قبیلہ ءِ مردماں جنگ بدے اے بلوچستان ءَ یک سسٹمے جوڑ بوتگ۔
بلوچی زند:بلوچستان ءُُ بلوچ قوم ءِ پد منتگی ءِ بنیاتی سوب ءُُ ھلت چہ انت؟
ظفر علی ظفرؔ: واجہ مئے قوم ءِ بنیاتی مسئلہ بے تعلیمی انت سردار وتی علاقہانی توک ءَ وانگ ءَ نیلنت ایجوکیشن بہ بیت اے دراں چیز ھلاس بنت بلے مئے وانوکیں مردم است انت سیاست کنگ ءَ انت۔ بلے انگت ءَ خاصیں کردے پیش دارگ ءَ نہ انت لہتیں گشیت ما بلوچستان ءَ آزات کناں، لہتیں گشیت مئے وڑیں قوم ءِ پرست نیست۔ بلے بلوچستان ءَ اے وڑیں مردم گندگ ءَ نہ بیت کہ آ بگشیت کہ مئے زھگ تعلیم حاصل بکں انت۔ بلوچستان ءَ چہ نقل ھلاس بہ بیت مئے زھگ بواننت کلاس بگرانت۔ مروچی انڈیا ءِ علاقہ کہر الا چارگ بہ بیت اودا صد در صد مردم وانندہ انت آھان یک انچیں تحریک ءِ دیما برتگ۔
ہر کس واننیت کنت آ بواننیت ھر کس کتابے دات کنت۔ کتابے بدنت مئے تحریک ءِ سوب ءَ اودا کسے ھم نا ونندہ نہ انت۔ مروچی مئے کر ءَ زرا است ما وتی قوم ءِ مردمے وانینت نکناں ہر کس بلوچ ءُُ بلوچستان ءِ خیرخواہ انت آ بلوچ قوم ءَ تعلیم بدنت۔ پدا بلوچ قوم وتی راہ ءَ وت دیما بارت۔
بلوچی زند:بلوچ وت وتی زبان ءَ گپ نہ کن انت ایشی سوب چہ انت؟
ظفر علی ظفرؔ: بچارمئے درستانی تشخص ہر چنکس کہ بلوچستان ءَ نشتگ انت بلوچی انت زبان ءِ باروا تعصب کنگ مہ بیت۔
بلوچی زند:زبان ءِ ھواری ءَ مئے بلوچی موسیقی ھم دومی زبانانی موسیقی ءَ ھور ءَ ھوار بوھگا انت اے باروا چہ کنگ لوٹیت؟
ظفر علی ظفرؔ: ہر چنز وھد ءَ گوں کمو بدل بیت من ءَ امیت انت کہ دیمترا مئے مردم پدا وتی بلوچی کلاسیکل موسیقی ءَ شوھاز کن انت۔ مروچی نور محمد نورل انت آ کہنیں شعراں شوھاز کنگ ءَ انت۔ فیض محمد ءِ وتی کلاسیکل اندازے بوتگ انچو مرید بلیدی بوتگ اُمیت انت انچیں مردم دیما کاینت ءُُ مئے موسیقی ءَ دیما برنت۔
بلوچی زند:بلوچی ءِ تہا تئی دوستیں گشندہ کئے انت؟
ظفر علی ظفرؔ: مرید بلیدی من ءَ سک دوست بوتگ۔
بلوچی زند:باز شاعر واقعاتاں چہ متاثر بنت ءُُ شاعری کننت اے باروا تئی چہ خیال انت؟
ظفر علی ظفرؔ: سیاست ءِ تعلق گوں سماج ءَ انت ہرچی سماج ءِ توک ءَ بیت۔ ما گنداں آئرءَ وتی شاعری ءِ توک ءَ کاراں۔
بلوچی زند:واجہ انچو گندگ ءَ بیت کہ شاعری چہ نثر ءَ ارزان انت۔ ہمے حاترا مردم گیشتر شاعری کن انت؟
ظفر علی ظفرؔ: شاعری ارزان نہ انت بلے نثر کمو تکانسری لوٹیت۔ تحقیق کنگ لوٹیت۔ بازیں انچیں چیز است انت کہ آ ملک ءُُ قوم ءِ حاترا فائدہ مند انت۔ بلوچستان ءِ باروا کتاب نبشتہ کنگ بہ بنت۔ بلوچستان ءِ معدن ءُُ زر ءِ باروا کتاب نبشتہ کنگ بہ بیت۔ بلے چار ورنا نندانت۔ فلانی ءِ پاگواجی ءَ مشاعرہ ءِ بوتگ۔ ہر کس پہ دیم وتی شعراں وانیت۔
بلوچی زند:واجہ بلوچی زند ءِ ذریعہ تو چہ کلہو دئیگ لوٹے؟
ظفر علی ظفرؔ: منی کلہو ہمیش انت بلوچی زبان ءَ بوانت بلوچی ءِ دیمرئی ءِ حاترا کار بکن انت۔ چوشکہ مئے بلوچی زبان ءِ تاک بند درا یگ ءَ انت۔ آھاں ءَ بواننت ہر کس ونت نہ کنت۔ تاک تاکے بزوریت تنکہ بلوچی تاکانی مالی کمک بہ بیت ءُُ آ چھاپ بہ بنت۔ مئے ورنایانی فرض انت کہ آ تحقیق بکن انت ءُُ علمءَ زانت ءِ نیمگا دلگوش بدے انت ءُُ رندا چیزے نبشتہ بکن انت۔
(دلگوش: اے گِند ءُُ نند ماہتاک بلوچی زند جون 2003 ءَ چاپ ءُُ شنگ بوتگ)۔