بنیادی صفحہ / نوشتانک / ظفر ءَ گوں وتی شائری ءَ یک کرنے ءِ کسّہ توام کُت…..زاہد رئیس راجی ؔ 

ظفر ءَ گوں وتی شائری ءَ یک کرنے ءِ کسّہ توام کُت…..زاہد رئیس راجی ؔ 

سلام ءُُ دروت ءُُ دراہ بات پہ دیوان ءِ مھماندار، مھمان ءُُ بَھرزورکیں مردماں!
پَہ من ءَ بزاں زاھدہ رئیسی ءَ دنیا ءِ گرانتریں کار ھمیش اِنت کہ نامداریں مردمے ءَ چَہ دُنیاءَ روگ ءَ پد آئی ءِ زند یا اِزم ءِ سرءَ گوشتانکے بِہ دَیاں ءُُ آ گوشتانک ھم پُرسی دیوانے ءِ بھرے بِہ بیت۔
آ مردمے کہ تو ھجبردیم پہ دیم ءَ نَہ دیستگ ءُُ تھنا کتابانی تہ ءَ آ ونتگ، آئی ءِ باروا نبشتہ کنگ ءُُ گپ جنگ ءَ پنچ دمان ءَ بہ گرتاں دو۲ادار ھم کم اِنت بلے وھدے کہ مردم انچین یے بہ بیت کہ تو ھمے زوتاں گوں آئی ءَ دیم پہ دیم بہ بئے،گوں آئی ءَ گوانکو ءِ سرءَ یا میسنجر ءِ سرءَ ءُُ شئیری یا گوشتانکی دیوناں گپ ءُ تران بہ بئے گُڑا مردم چَہ وت ءَ وت ھجالت بیت اِنت کہ باید آئی ءِ شَرّیّانی توسیپ من آئی ءِ زندمانی ءَ بِہ کُت اِنت کہ بلکیں چریشی ءَ آئی ءِ دل وشتر بیتگ اَت ءُ دوروچ گیشتر مئے ھمراہ اَت۔
بلے نَے ملکموت چَہ ساہ ءِ کبز کنگ ءَ پیش مارا ھال دَنت کہ مَن اِے کار ءِ کنگ ءَ رَوَگ ءَ آں شُما ھیالداری بہ کن اِت ءُُ نے کہ مئے جند ءِ تہ ءَ اِنچو بودناکی مان اِنت کہ ما زندگینانی کدر ءُُ بستار ءَ بہ زان ایں۔
چَہ ظفر علی ظفرؔ ءِ بیرانی ءِ راستیں ھال ءَ چیزے ماہ پیسر، ھالے رس اِتگ اَت کہ آئی ءِ تب سک نگیگ اِنت ءُُ تحت ءِ باھوٹ اِنت بلے وھدیکہ من ایف بی مسینجر ءِ سرءَ ھما روچ ءَ آن لائن دیست سک ھیران ءُ ھجکہ بیتاں کہ بلکیں دِگہ مردمے آئی ءِ پجارنام (آئی ڈی)ءَ کارمرزگءَ اِنت۔
وھدے من وتی اے گُمان ءِ باروا یک سیاھگی کلوھے ھما آئی ڈی ءِ سرء َدیم دات، چَہ دیم ءَ واجہ ظفر علی ظفرؔ ءِ جند ءَ گوں وتی توارءَ پسو دات کہ بانک!اِے من آں ءُ دگہ کسے نہ اِنت وَھدیکہ من پَہ ھال پُرسی ءَ کال کُت گُڑا پسّویے ھمیش اَت کہ چوش ھم پیری ءَ من ءَ نہ جَتگ کہ من چَہ گپ ھبر ءَ اوں بہ کپاں۔
ظفر علی ظفرؔ ءِ مرگ ءِ راستین ھال ءَ پد ھم باوری نہ اِتاں بلے سوشل میڈیا ءِ سرءَ شنگ ءُُ تالانیں جنازہ ءِ اَکساں پدّرکُتگ اَت کہ ملکموت ءِ ھمک ھالے دروگ بیت نہ کنت ءُُ ظفر ءَ وتی زندگی ء ِتوک ءَ ملکموت دَہ رند ءَ گوانک جَتگ نوں چوش وَ بوت نہ کنت کہ ملکموت مُدام چک ءُ پد بہ بیت۔
قول ء ظفر:
؎”جنت ءِ ھُور گل ءَ پیم نہ بنت کہ مرچی
ھال تئی مرگ ءِ ظفر گیدی ءَ تالاں بیتگ“
چونائی ءَ ظفر علی ظفر ؔمن باز ء َنہ ونتگ کہ مزنیں پتاری یے کُت بِہ کناں بلے گوشندھانی سوت ھاس نورمحمد نورل ءِ توار ءَ ظفر ءِ پربند ھرھما مردم ءِ گوشاں چَو شیرکنیں شھدے ءِ رنگءَ ایر ریتکگ، آ بے وانگ ءَ ھم ظفر ءِ پربندانی شیدائی جوڑ بیتگ۔ پہ درور:
چَہ من ءَ چیا بدگُمان ئے تو
زاناں اِے گپّ ءَ وت نزان ئے تو
تو نہ بئے گپّاں ھچ منی سرپد
زانت ءَ چو مِسل ءِ کودکان ئے تو
اِے منی بَھت ءُُ آ تئی تالہ
من گَماں باراں شادمان ئے تو
اَلّم ءَ منزل ءَ رَس ئے روچے
اُمرے گوستگ کہ سرجنان ئے تو
دل ظفر ؔندر اِنت پہ تئی گالاں
مئے گم ءُُ اندوہ ءِ زبان ءِ تو
ظفر علی ظفرؔ ء ِبلوچی دستونکی شائری ءِ مستریں وشّی ایش اِنت کہ آ شائری ءَ پہ زور نہ کنت ءُُ نے کہ گرانیں ءُُ زگریں لبزانی کمایگ ءَ گوں وتی شئیر ءِ بستار ءَ بُرز کنگ ءِ سمائی یا شعوری جُھد ءَ بہ کنت۔
آ مئے شُمئے ھمروچی زبان ءِ تہ ءَ وتی اندری پگرءُُ مارشتاں انچوش دستونک ءِ زبان ءَ درشان کنت کہ وانوک ءُ اِشکُنوک ءَ سما کپ ایت کہ اِے آئی ءِ وتی اندرءِ تران اِنت۔ پَہ دَروَر ِاے شئیراں بہ چاراِت:
ھون اندیم نہ بیت، ھون ءِ نکابانی پدءَ
اے گنوکی ءَ مہ کن تو وتی وابانی پدءَ
بیا بہ کن سیل بھار ءَ دل ءِ ٹپّانی منی
اینکدر دیر مرو، سُھریں گُلابانی پدءَ
یا اے شئیراں بہ چاراِت:
چَہ درستاں پیسرءَ سرگپتگاں من
پَہ تو چَک ءُُ پداں پشت کپتگاں من
مَہ ٹوھین اِت من ءَ مُنکِر نکیراں
کہ دراجیں مُدّتے رَند وپتگاں من
اگں نہ یا اِے چاربنداں دِلگوش بہ دئیت:
من ھمک رنگ ءَ، وتءَ گوں تو، شریدار کُتگ
دانکہ شوھازءَ تئی، جند وتی، گار کُتگ
بیا کُجائے منی دردانی زِرءِ مُروارِد
اُمرے گوستگ کہ زھیران ءَ گورءِ ھار کُتگ
آ کسے کہ دستونکءِ شائر اِنت اے گپ ءَ پَہ شرّی مالوم ءُُ سرپد اِنت کہ ردیف (رِد)ءِ گرانی دستونک ءِ دستونکیت یا شئیر ءِ شئیریت ءَ تاوان دَنت پدءَ وتی جند ءِ نام ءَ ردیف کنگ ءُُ سَنگ ءُُ پارسنگ ءُُ ترز ءُُ ترنّمءُُ موسیقیت ءَ برجم دارگ اِے کسانیں کمالے نہ اِنت کہ کُل اردو ءِ شائرانی،اِے سَنچ یک پاریگہ نئیت دانکہ شپ ءُُ روچ گوں شئیری ازم ءَ لئیب ءُُ گوازی کنگ مَہ بیت۔ بلے ظفر ءِ ابرمی یا فطری تب کہ دستونک گوشی ءِ نیمگءَ اَت، آئی ءَ وتی نام ءِ ردیف ھم چو سُبک ءُُ وشیں تبے ءَ ھوار کُتگ:
؎بنوش کدّھاں، کیپانی زپتیں، نوش ظفر
جھان ءِ رنج ءُُ گم ءُُ شِدّتاں شموش ظفر
کے ءَ گوں دارئے گلگ، چَہ کے ءَ اُمیتوارئے
کے ءَ گم ءَ تئی گپتگ، کے ءَ تئی ھوش ظفر
ھتم بہ بیت کہ بھارگارہ، پما یک ڈول اِنت
گم ءِ کِشار اِنت ءُُ دردانی رون موش ظفر
دنیا ءَ دستونکءِ شائری ءِ تہءَ مستریں شائر ھمایاں گوش اَنت کہ ارزانیں لبزاں گوں گرانیں ءُُ نوکیں ھیالے پربندگ بہ بیت۔ یا کُھنیں ھیالے ءَ نوکیں تب ءُُ درشانے دَیگ بِہ بیت پہ دَروَر:
؎کپوتاں پَہ دل ءِ زیماں بہ چاراِت
زھیری نالگاں سَھتے بہ داراِت
مَہ پِرّین اِت گُل ءِ یات ءَ من ءَ را
بھاراں آسمی پُلاں میاراِت
شلیناں ترونگلیں ارساں اِدءَ من
زِری نوداں دِگہ دِیمے بِہ گوار اِت
تْرھیناں گم جَتیں ڈِیل ءَ دمانے
چَہ کیپاں کدّھے پُرّیں بیاراِت
ظفر بے دَروَریں شئیراں گوشان اِنت
گُلیں کاڑاں شُما زِیّل ءَ بہ دار اِت
ظفر ءِ شائری ءِ تہ ءَ پَہ گوناپ سازی ءَ گرانیں چھر ءُُ شُبین ھم ھوار نہ اَنت آ دیم ءِ گپ ءُُ چیزان ھما رنگ ءَ پربندایت کہ شائری وت یک اکس یا تامورے ءِ دروشمءَ وتی اِشکُنوک یا وانوک ء ِدیم ءَ روان کنت پَہ دَروَر:
؎چارگ ءُُ بچکندگ ءُُ دیم ءِ گِرگ
بُن گنوکی ءِ سرءِ ھوش ءِ رَوگ
کنجلاں سیاھی چَہ زُرتگ جمبراں
زامُریں بیکاں چَہ پُلّاں سَمبھگ
شَنزاِتگ نوداں زِری، آتکگ بھار
بے سبب جزماں نَہ اِنت جِیگ ءِ دِرَگ
زِندبے مَھگونگءِ نِیادءَ ظفر
انچوش اِنت تبد ءَ، کشار ءِ گیمُرگ
ظفر علی ظفرؔ ءِ شعری مڈّی بلکیں آ رنگ ءَ نَہ اِنت کہ آئی ءِ اَھد ءِ اِے دگہ شائرانی گورءَ اِنت بلے ظفر ءَ ھرچے کہ بلوچی زبان ءِ شئیری لبزانک ءَ را داتگ وتی درشان داب ءِ برکت ءَ وت ءَ منارینتگ۔
ظفر ءَ رند ظفر ءِ شائری مئے دیم ءَ اِنت کہ اِشکُنگ بہ بیت وانگ بِہ بیت، وانشت ءُُ زانشتی رِدءَ تپاسگءُُ پولکاری کنگ بہ بیت ءُُ نگدکاری کنگ بہ بیت، آئی ءِ درشان داب ءُُ جمالیات ءِ سرءَ کار کنگ بہ بیت کہ آ اِے درستیں چیزاں کرزایت۔من وتی گوشتانک ءَ چَہ ھمِدءَ کُٹیناں ءُُ منتواراں زند اکیڈمی ءِ شونکار ءِ کہ لبزانکی نودربرے ءَ وتی اُستادانی میان ءَ آھگ، اُوشتگ ءُُ گوشتانک دیگ ءِ شرپ ءِے بکشاتگ۔ وش ءُُ سلامت بات اِت۔
دلگوش: اے نبشتانک واجہ ظفر علی ظفر ءِ باروا بلوچی لبزانکی دیوان کوئٹہ ءُُ زند اکیڈیمی نوشکی ءِ نیمگا برجم داشتگیں دیوان پریس کلب کوئٹہ ءَ وانگ بوتگ۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*