شاعری

غزل
ظفر علی ظفر اگست 2019

روچ ءَ ماں آس ءُُ انگراں برتکگ
دل شپ ءَ درد ءِ پاھو ءَ درتکگ

دیدگاں کاینت ھون ھواریں ارس
شِل سریں اندوھاں جگر سِستگ

من دل ءَ چہ، ءُُ دل من ءَ پُرس ایت
مئے گُلیں وش وابی کَے ءَ بُرتگ

گوں وت ءَ مارا بَرگل ءِ کاسد
کاگد ءُُ کرّاچ ءِ حبر گوستگ

کجّ اِتگ یات ءَ دل ظفر! لال ءِ
ماپد ءَ ترّیں ما سگے بستگ

٭٭٭٭٭٭٭٭٭٭٭٭٭٭٭٭٭٭٭٭٭
غزل
ظفر علی ظفر اگست 2019

من ھمک رنگ ءَ وت ءَ گوں تو شریدارکتگ
دانکہ شوھاز ءَ تئی جندوں وتی گار کتگ

بیا کجائے منی دردانی زرءِ مُروارد!!
اُمرے گوستگ کہ زھیران ءَ گورءِ ھار کتگ

بے بلابات تئی اندوھاں، مہ درواَنت دل ءَ
گم نہ اِنت تو کہ من ءَ گرانیں گماں بار کتگ

سَرجن اِت اِنچو اَے مُلاّ ءُُ تبیباں پرچے
بَندءُُ تائیداں کدی اِشک ءِ گنوک سار کتگ؟

دل نہ رنجینتگ جھان ءَ پہ شگان ءُُ پیگور
من کمان میان ءِ ظفر ھاترا اوپارکتگ
٭٭٭٭٭٭٭٭٭٭٭٭٭٭
غزل
مہر اللہ مہر اگست 2019

بے کَدر بازار ءَ دْروگ ءِ راست گُشے
دیدگ ءُْ دَست ءِ دِل ءَ کَندیل کُشے

جمبراں مانپوشتگ چاریں  کَشاں
اَنگت ءَ پہ من نہ درنزاَنت یک تُشے

شَرّیانی روچ ءِ رُژن ءَ دِلجم آں
درشت نہ کنت لنجیں بدی ءِ ہِچ ہَشے

مقصد ءِ داباں گوں  گَردایت بَہر کنت
مِہوشی نام ءَ نہ کَرزایت مِہوشے

ہر کَسّے زانت آئی ءِ کار وَ بِزانت
دِل نہ منّوکیں  وران اِنت بَش بَشے

مِہرؔتئی پہ سَکّیانی نوبتاں
چَہ کُج ءَ اَرسے بیارایت چَم جْشے
٭٭٭٭٭٭٭٭٭٭٭٭٭٭٭٭

غزل

منظورسادگ اگست 2019

نہ بیت گِندگ مروچاں شیرسبز
شَکر گالیں منی آ وش لبز
مردم الہان کن اَنت تئی نام ءَ من
منی شعرانی توئے شانتل ترز
کُتگ سجدہ تئی عکس چو خُدا ءَ
منی بوتگ سر ءَ کہ انچو فرض
بکن امباز من ءَ را گوں اَداہاں
بِگر دست ءَ منی تو ہِچ مَلرز
بہ پہم درداں منی تو شَرّی ءَ
کناں من گون ترا کہ وہدے عرض
من ءَ را یل کن ئے وہدے روئے تو
منی دیدگ کن اَنت چو نود ءَ شَنز
یکّے بوتاں دل منی ءُُ تئی پد ءَ
نوں مباتاں شانتل ءُُ منظور دَرز

٭٭٭٭٭٭٭٭٭٭٭٭٭٭
غزل
ظفر علی ظفر اگست 2019
چمّ اِت پوراں سکّ اَنت راہ ءَ روان ئے پرچیا؟
اَجگ ءُُ نازُرکیں گُلاں پاد مال کناں ئے پرچیا؟

دل بُلوریں مندگ اِنت پہ تژنے ءَ ترندیں ءُُ تو
مُشتکے دست ءَ کتگ پاداں گِراں ئے پرچیا؟

مَھتل اِنت ارواہ منی ھمبل!پہ لال ءِ گندگ ءَ
تو سَرون ءَ نشتگ ءُُ یاسین وان ئے پرچیا؟

اوست ءَ دیدار ءِ گوں تُنیگیں دلے اِشت ءُُ شُتاں
نی سرءُُ سرچادری نودی شلان ئے پرچیا؟

گوں وتی ھوناں من سِرادیں کِشکے پتّوکشّ اِتگ
انگت ءَ تو منزل ءِ راہ ءَ نزان ئے پرچیا؟

لانچ اِتگ پُھل ءَ سرات ءِ پہ گُلے گوازیں ئے تو
راست ءُُ تچکیں راہ ءَ سر کونڈی وران ئے پرچیا؟

٭٭٭٭٭٭٭٭٭٭٭٭
غزل
ظفر علی ظفر اگست 2019

نے سلامے نَے ھال ءُُ اھوالے
ما سگے بندان ءُُ جَناں پالے
زیت کن ءُُ بیا کہ زھیرمن ءَ نیل اَنت
پمّن ءَ یک روچے گوش ئے سالے
دوست ءِ دیدار ءَ دل منی بندانت
ھاجتوں نیست اِنت پہ دگہ مالے
نَے من ءَ دروہ ایت نے کہ ھمراہ اِنت
زند منی بیتگ پمّن جنجالے!!
ھے کن اِت بیلاں کہ ظفر ؔگار اِنت
شائرے شرّیں وار ءُُ اوبالے

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*