بنیادی صفحہ / ادبی جاور حال / رپورٹ: محمد عامر مینگل

رپورٹ: محمد عامر مینگل

بلوچی لبزانکی دیوان کوئٹہءِ نیمگا واجہ بشیر بیدارؔ ءِ باروا رد ءُُ بند داتگیں کتاب ”درپشیت تلاھیں بامسار“ ءِ دیمدرائی دیوان

رپورٹ: محمد عامر مینگل
جولائی ءِ 18 تاریخ ءَ بلوچی لبزانکی دیوان کوئٹہ ءِ نیمگا واجہ بشیر بیدار ءِ باروا طاہر حکیم بلوچءِ ردءُُ بند داتگیں کتاب”درپشیت تلاھیں بامسار“ ءِ دیمدرائی دیوان پریس کلب کوئٹہ ءَ برجم دارگ بوت۔ اے دیوان ءِ پاگواجہ بلوچی زبان ءِ نامداریں شاعر بشیر بیدار اَت۔ وھدیکہ حاصیں مہمان بلوچستان ءِ ساری ءِ سر وزیر ڈاکٹر عبدالمالک بلوچ اَت۔ دیوان ءِ اعزازی مہمان اردو زبان ءِ نامداریں افسانہ نگار آغا گل اَت۔ اے دیوان ءَ اسٹیج ءِ سرا یشاں ابید ایم پی اے لالہ رشید، رحمت بلوچ، ممتاز یوسف طاہر حکیم بلوچ ءُُ یار جان بادینی ساڑی اتنت۔ اے دیوان ءِ مہماندار میر بلوچ خان اَت۔
دیوان ءِ بندات تلاوت کلام پاک ءَ چہ بوت کلام پاک ءِ وانگ ءِ شرف محمد عامر ءَ ادا کرت۔

دیوان ءِ بندات ءَ عالم سیف ءَ بشیر بیدار ءِ شعری ازم ءِ باروا وتی نبشتانک ونت رندءَ پروفیسر تربت یونیورسٹی صادق صباءَ ”درپشیت تلاھیں بامسار“ ءِ سرا یک شریں نبشتانکے ونت آئی ءَ طاہر حکیم بلوچ رد ءُُ بند داتگیں کتاب ءِ درا تک ءُُ پہناتانی سرا چمشانک دور دات۔ آئی ءَ یک سرجمیں مقالہ ءِ واجہ بشیر بیدار ءِ کتاب ءِ باروا ونت۔
واجہ پروفیسر رحیم مہرؔ ءَ ھم طاہر حکیم بلوچ ءِ رد ءُُ بند داتگیں کتاب ءِ سرا یک مقالہ ءِ ونت ءُُ بشیر بیدار ءِ شاعری ءِ درا تک ءُُ پہناناتی سرا وتی گپ جت انت۔ آئی ءِ نبشتانک ءِ سرحال ”درپشیت تلاھیں بامسار“ ءُُ بشیر بیدار اَت۔
انچو پروفیسر اے آر داد بلوچؔ ءَ بشیر بیدار ءِ باروا رد ءُُ بند داتگیں کتاب ءِ سرا سرجمیں مقالہ ءِ پیش کرت۔ واجہ اے آر داد ءِ نبشتانک ءِ سرحال روچ ءِ چنچو مانا انت۔
دیوان ءِ دیما تران کنان ءَ بلوچی اکیڈیمی ءِ چیئرمین حاجی ممتاز یوسف ءَ واجہ بشیر بیدار ءِ ادبی ھزمتاں سہڑاھت ءُُ گشت کہ واجہ بشیر بیدار ہستیں دورے مزنیں شاعرآنی تہا زانگ بیت آئی ھذمت بلوچی زبان ءُُ لبزانک ءِ حاترا باز انت۔ آئی ءَ طاہر حکیم بلوچ ءُُ بلوچی لبزانکی دیوان ءِ شکُر ءُُ منت گپت کہ آھاں بشیر بیدار ءِ باروا کتاب رد ءُُ بند داتگ ءُُ شریں وڑھے چاپ کرتگ۔ اے کتاب ءَ چہ ورناہاں باز معلومداری رسیت۔
دیوان ءِ دیما تران کنان ءَ کتاب ءِ رد ءُُ بند دیوک طاہر حکیم بلوچ ءَ گُشت کہ واجہ بشیر بیدار ہستیں دورے مزنیں شاعر انت آئی شاعری بے درورانت من لوٹت بلوچی زبان ءِ اے نامی ایں شاعر ءِ باروا ہرچنکس نبشتانک نبشتہ کنگ بوتگ آ درا ھور ءُُ یکجا کنگ بہ بیت تنکہ واجہ بشیر بیدار ءِ شاعریءِ باروا زیات ءَ چہ زیات معلومداری دیما بیت۔ ہر کس اے پڑ ءَ پٹ ءُُ پول کنگ لوٹیت آئی ءَ چہ اے کتاب ءَ مدت ءُُ کمک برسیت۔ آئی ءَ بلوچی لبزانکی دیوان ءُُ خاص کر یارجان بادینی ءِ شکر ءُُ منت گپت کہ آئی ءَ ”درپشیت تلاھیں بامسار“ شریں وڑھے ءَ چھاپ ءُُ شنگ کرتگ۔
بلوچستان ءِ جان سلامتی ءِ ساری ءِ وزیر میر رحمت بلوچ ءَ تران کناں ءَ گُشت کہ بلوچی لبزانکی دیوان ءُُ یار جان بادینی لکھ ستائے لائق انت کہ آ مدام اے وڑیں دیوان ءُُ پروگرام برجم دارنت۔ اے گپ ءِ تہا ہچ شک نیست کہ واجہ بشیر بیدار یک باز نامداریں شاعرے انت آئی ھذمت بلوچی زبان ءِ واستہ سک باز انت۔ بلوچی زبان ءُُ لبزانک ءِ گل ءُُ ادارہانی سرافرض انت کہ آ وتی شاعر ءُُ کلمکاراں ھر وڑا دلبڈی بدے انت۔ آئی ءَ گُشت کہ وھدے ڈاکٹر مالک بلوچ بلوچستان ءِ سر وزیر اَت بلوچستان ءِ تہا زبانانی باروا بازیں تاریخی کار کرت انچو شاعر ءُُ کلمکار انی ھر وڑا مدت ءُُ کمک کرت۔
بلوچستان اسمبلی ءِ باسک لالہ رشید ءَ دیوان ءَ تران کنان ءَ گُشت کہ واجہ بشیر بیدار بلوچی شاعری ءِ کوھیں کلات انت کہ آئی ہر چنکس سپت ءُُ ثناءَ کنگ بہ بیت کم انت۔ آئی ءَ گُشت کہ ماں وتی طالب علمی ءِ دور ءَ مدام بشیر بیدارے گال ءُُ گفتار ونتگ۔ آئی ءَ گُشت کہ یار جان بادینی ءُُ بلوچی لبزانکی دیوان لکھ ستائے لائق انت کہ آ مدام اے وڑیں لبزانکی پروگرام برجم داریت۔ اے درگت ءَ منی یار جان بادینی ءَ لوٹ انت کہ آ غلام حسین شوھازءِ باروا یک پروگرامے برجم بہ داریت تنکہ بلوچی زبان ءُُ لبزانک دیما بروت آئی بلوچی لبزانکی دیوان ءِ حاترا یک لکھ کلدارے وتی نیمگا جار جت۔
دیوان ءِ اعزازی مہمان نامداریں افسانہ نگار آغا گل ءَ گُشت کہ بلوچستان ءِ تہا علم ءُُ زانت، زبان ءُُ ادب ءِ نیمگا باز دلگوشی دیگ بوھگا نہ انت اے مئے بنیاتی مسئلہ انت۔ ہر قوم ءُُ راج ءِ تہا پکر ءُُ سسا ودی بوت آ مُردم راج زند ءِ درا پڑءَ دیما روت۔
واجہ بشیر بیدار بلوچی زبان ءِ شاعرے انت کہ آ وتی شاعری ءِ زریعہ ءَ وتی قوم ءُُ راج ءَ پکر ءُُ سسا دنت۔ بشیر بیدار ءِ کمال ایش انت کہ آ بلوچی شاعری ءَ ھوار اردو زبان ءَ ھم شاعری کنت۔ آئی اردو زبان ءَ شاعری ھم باز جوان انت۔ گڑ سرا من بلوچی لبزانکی دیوان ءِ منت واراں کہ آئی ءَ مارا مروچی اے مراگش ءَ دعوت دات ءُُ گپ کنگ ءِ موہ دات۔
واجہ بشیر بیدار ءَ درستاں چہ پیش بلوچی لبزانکی دیوان ءُُ خاص کن یا رجان بادینی ءِ شکر ءُُ منت گپت کہ آئی ءَ حاصیں وڑا آئر ءَ کراچی ءَ چہ کوئٹہ لوٹائینگ۔ یار جان بادینی ءَ ھدا زندگی بہ دنت کہ آ مدام انچیں کار کنت۔ آئی لبزانکی کارے ءُُ ھذمت بازانت آئی ءَ نہ ایوکہ ترکمانستان، افریقہ، عمان، قطر، بحرین ءِ بلوچانی باروا خاصیں تاک چھاپ کرتگ۔ بلکیں بلوچی زبان ءِ کلمکار ءُُ کواسانی باروا خاصیں تاک چھاپ کرتگ۔ آئی ءَ یک وارے من ءَ نوشکی ءَ برت ءُُ منی شرف ءَ یک دیوانے برجم داشت۔
واجہ بشیر بیدارؔ ءَ طاہر حکیم بلوچ ءِ ھم شکر ءُُ منت گپت کہ آئی ءَ اے کتاب منی باروا رد ءُُ بنددات ءُُ یا رجان بادینی ءَ شریں وڑے ءَ چھاپ کرت۔
منی جند ءَ اینکس معلوم نہ انت کہ منی باروا اینکس نبشتہ کنگ بوتگ۔آئی ءَ وتی بازیں گال ءُُ گفتار،دپگال کرت۔ بلے دیوان ءَ ساڑھی ایں مردماں آئی یک یک شعرے فرمائش کرت آ وتی شعر دیوان ءِ دیما ونت آئی گشت کہ اُردو منی زبان نہ انت بلے من اردو زبان ءَ ھم شاعری کناں آئی ءَ وتی اُردو شاعری ءِ بازیں شعر دیوان ءِ دیما پیش کرت۔ دیوان ءَ ساڑھی ایں مردماں آئی واستہ باز چاپ جت۔
دیوان ءِ حاصیں مہمان بلوچستان ءِ پیش ءِ سر وزیر ڈاکٹر عبدالمالک بلوچ ءَ تران کنان ءَ گُشت کہ بلوچی زبان ءِ شاعرآنی شعر ءُُ شاعری گوں وتی وطن ءُُ سرزمین ءَ مہر ءُُ دوستیءِ نشانی انت ماتی زبان ءِ دیمرئی ءِ حاترا ھوریں جہد ءُُ کوشست ءِ گزر انت۔ آئی ءَ گشت کہ شاعر چاگرد ءِ ادینک انت واجہ بشیر بیدار ءِ بلوچی زبان ءُُ لبزانک ءِ حاترا ھذمت لکھ ستائے لائق انت بشیر بیدار ءَ گوں منی تعلقداری سک کہن ءُُ کدیم انت 1970 ءَ بگرتاں 1980 ءَ بی ایس او ءِ ہچ اے وڑیں پروگرامے نہ بوتگ کہ آئی ءِ تہا بشیر بیدار ھوار نہ بوتگ آئی شعر ءُُ شاعری ورناہاں زبانی یات بوتگ انت آئی ءَ وتی شاعری ءِ زریعہ ءَ پکر ءُُ سسا ودی کرتگ۔ آئی ءَ طاہر حکیم بلوچ ءُُ بلوچی لبزانکی دیوان ءِ شکر ءُُ منت گپت کہ آھاں ”درپشیت تلاھیں بامسار“ شریں وڑے ءَ چاپ ءُُ شنگ کرت۔
دیوان ءِ گڈ سرا بلوچی لبزانکی دیوان ءِ چیئرمین یار جان بادینی ءَ درا مہمانانی شکر ءُُ منت گپت کہ آ واجہ طاہر حکیم بلوچ ءِ رد ءُُ بند داتگیں کتاب”درپشیت تلاھیں بامسار“ واجہ بشیر بیدار ءِ باروا انت اتگ ءُُ ساڑی انت آئی ءَ گشت کہ واجہ بشیر بیدار ءَ سک دیر انت کوئٹہ ءَ نیاتگ من مدام مارت کہ درا شاعر ءُُ کلمکار وھدپہ وھد کوئٹہ ءَ کاینت بلے بشیر بیدار ءَ دیر انت کوئٹہ ءَ نیاتگ۔ من آئر ءَ فون کرت کہ واجہ ماں ظفر علی ظفر ءِ یات ءَ پروگرامے برجم دارگاہاں تہ لازم مئے دیوان ءَ بیا۔آئی ءَ گُشت من چاریں من گشت واجہ ترا آئیگی انت واجہ بشیر بیدار وتی بچ دیدگ بشیر ءِ پجی ءَ ات من آئی سک منت واراں۔
انچو طاہر حکیم منی دوست ءُُ سنگت انت آئی ءَ گشت کہ من واجہ بشیر بیدار ءِ باروا کتاب ءِ رد ءُُ بند داتگ چاپ بکن من گشت کہ من لازم چاپ کناں ماں کتاب چاپ کرت کتاب شمے دیما انت۔ مروچی اے دیوان ءِ تہا من پادا جار جنان کہ واجہ بشیر بیدار وتی شاعری ءِ درا کتاباں مارا بہ دنت۔ ماں آئی
کُلیات ءَ ھم چھاپ کناں من یک وارے پدا واجہ بشیر بیدار، ڈاکٹر مالک بلوچ، آغا گل، رحمت بلوچ، لالہ رشید، طاہر حکیم بلوچ، پروفیسر اے آر داد، پروفیسر رحیم مہر، پروفیسر صادق صباء، میر بلوچ خان ءِ بلوچی لبزانکی دیوان ءِ نیمگاشمے درستانی منت واراں کہ شما اَت ءُُ مئے دیوان ءَ بہر زرت ءُُ مارا شرف بخشات۔
دیوان ءِ گڈ سرا میر بلوچ خان مہمانانی شکر ءُُ منت گراناں ءَ جار جت کہ دیوان ءَ ساڑی ایں مہمان ءُُ نندوکیں مردمانی حاترا ریفریشمنٹ ءِ بندوبست کنگ بوتگ۔ رپورٹ: محمد عامر مینگل

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*