اسلام آباد کلب ءَ عمان ءِ بلوچ کتاب ءِ دیمدرائی دیوان

رپورٹ: باری بلوچ

زند اکیڈمی نوشکی، بلوچستان اکیڈمی آف سائنسز ءُُ گلوبل پیس انٹر نیشنل ءِ بند ءُُ بوج ءَ یار جان بادینی ءِ کتاب ”عمان ءِ بلوچ“ ءِ دیمدرائی دیوان اسلام آبادکلب ءَ برجم دارگ بوت۔ اے دیوان ءِ پاگواجہ سینیٹر کبیر جان محمد شہی اَت۔ وھدیکہ دیوان ءِ حاصیں مہمان اسلام آباد ءَ عمان ءِ سفیر شیخ بن عمر بن احمد المرہون اَت۔
اے دیوان ءَ عمان ءِ سفیر ءَ ابید کویت، یمن، مراکو، ترکمانستان ءُُ آزربائیجان ءِ سفیر ءُُ سفارت کارھم ساڑی اتنت۔
دیوان ءِ بندات چہ تلاوت کلام پاک ءَ بوت۔ دیوان ءِ بندات عمان، کویت، یمن، مراکو، ترکمانستان ءُُ آزربائیجان ءِ سفیراں بلوچی رسم ءُُ دود ءِ ردا مہماناں بلوچی دست مال گورا دیگ بوتگ۔دیوان ءِ بندات ءَ گلوبل پیس انٹر نیشنل ءِ سروک بانک فرح عظیم شاہ ءَ تران کناں ءَ درا مہمانانی گوں دل ءِ حُب ءُُ واھگ ءَ شکر ءُُ منت ءَ گپت کہ آ حاصیں وڑا اے دیوان ءَ آہتگ ءُُ ساڑی انت۔

آئی ءَ گُشت کہ منا باز وشی بوھگا اِنت کہ عمان ءِ بلوچ ءِ کتاب بلوچستان ءِ مردمے نبشتہ کرتگ اے کتاب زبان ءُُ لبزانک ءِ یک مزنیں مڈی ءِ ھوار عمان ءُُ پاکستان ءِ دوستی ءِ یک مزنیں چیدگ ءِِ جوڑ بیت۔ چیاکہ منی تعلقداری چہ بلوچستان ءَ اِنت ءُُ بلوچ دنیا ءِ بازیں ملکاں نشتگ ءُُ جاہ منند اَنت۔ یار محمد بادینی بلوچستان ءِ اولی کلمکار ءُُ پٹ ءُُ پولکار انت کہ آئی ءَ عمان ءِ بلوچاں ابید بحرین، قطر، امارات، ترکمانستان ءُُ افریقہ ءِ بلوچانی سرا مزنیں پٹ ءُُ پولے کرتگ۔
بلوچ صدانی سال پیش بلوچستان یل داتگ ءُُ دومی ملکانی تہا جاہ منند بوتگ انت۔ اے درا مُلکانی تہا جاہ منند یں بلوچانی باروا پٹ ءُُ پول کنگ یک آسانیں کارے نہ اِنت۔ پدا ھم اے ورنا ہمت کرتگ۔ آئی جہد ءُُ کوشستانی برور د شمے دیما اِنت آئی عمان، کویت، یمن، ماراکو، ترکمانستان ءُُ آزر بائیجان ءِ سفیرآنی شکر ءُُ منت ءَ گپت کہ آمروچی اے دیوان ءَ آہتگ ءُُ ساڑی انت۔
دیوان ءِ دیما تران کناں ءَ ڈاکٹر حفیظ جمالی ءَ گشت کہ بلوچستان ءُُ عمان ءِ تعلقداری سک کہن ءُُ کدیم اِنت۔ ایشی ءِ زندگیں مثال گوادر اِنت کہ عمان ءِ سلطان وھدے بلوچستان ءَ آہتگ ءُُ بلوچستان ءِ خان ءَ گوادر عمان ءِ سلطان ءَ داتگ۔ اے کتاب عمان ءِ باروا بلوچانی یک تاریخءِ اِنت۔ اے کتاب ءِ ریفرنس ہما انٹرویوز انت کہ واجہ یار جان بادینی ءَ وت عمان ءِ تر ءُُ گرد ءِ وھدءَ گپتگ۔ عمان ءُُ گوادر ءِ باروا پرتگیزیانی مزنیں تاریخے است، پرتگیزیاں نہ ایوکا بلوچستان ءِ ساحل ءِ سرا اُرش کرتگ، بلکن عمان ءِ سرا ھم قوضہ کرتگ۔
اے کتاب یک بنداتی کارے انت اے باروا زیات ءَ چہ زیات پٹ ءُُ پول کنگ لوٹیت۔
یار جان بادینی ءِ اے پٹ ءُُ پولی کتاب ءَ چہ ورنا ایں پٹ ءُُ پولکاراں باز مدت ءُُ کمک رست کنت کہ عمان ءَ گوادرے باروا اے اولی بنداتی کار اِنت۔
دیوان ءِ دیما تربت یونیورسٹی کیچ ءِ رجسٹرار غلام فاروق بلوچ ءَ یک سرجمیں نبشتانکے انگریزی زبان ءَ ونت ءُُ پیش کرت کہ عمان ءِ بلوچ ءِ کتاب بلوچی زبان ءُُ لبزانک ءِ حاترا مزنیں مڈی ءِ انت۔ اے پٹ ءُُ پولی کار یونیورسٹی ءُُ انسٹیٹیوٹانی اِنت کہ آھانی گورا وسیلہ باز انت بلے اے درگت ءَ یار جان بادینی ءَ آفرین انت کہ آ یکیں سر ءَ انکس بازکار کرتگ ءُُ کنگا اِنت۔
چیاکہ یار جان بادینی ءَ مزنیں وھدے منی پجی ءَ کارکرتگ۔ وھدے ماں ماہتاک بلوچی لبزانک ءَ چھاپ ءُُ شنگ کنگا اَت تو یار جان بادینی ءُُ آئی سنگت نور خان محمد حسنی سال 1998 ءَ ترکمانستان ءِ تر ءُُ تاب کرت۔ ماں ترکمانستان ءِ بلوچانی باروا حاصیں نمبرے درکرتگ۔ رندءَ سال 1999 ءَ اے ورنا افریقہ ءِ تر ءُُ گرد کرت، ماں ماہتاک بلوچی لبزانک ءِ افریقہ ءِ نمبرے در کرت۔ اے ھر دو حاصیں تاک باز نامدار بوت انت۔
چریشی پد یار جان بادینی وتی کار برجاہ داشت عمان، قطر، بحرین ءِ بلوچانی باروا پٹ ءُُ پول کرت ءُُ خاصیں نمبر در کرتگ۔ چریشی ابید یار جان بادینی ءَ ماہتاک بلوچ لبزانک ءِ واستہ درجنانی درجن انٹرویو گپتگ کہ آوت یک مزنیں تاریخے اِنت۔
عما ن ءِ بلوچ ءِ کتاب ءَ چہ مسکت ءُُ گوادر ءِ مردمانی مہر ءُُ دوستی گیشتر ودینت کہ آھانی تاریخ ءُُ راجدپتر پدر کنگ بوتگ۔ منی اے واھگ انت اے وڑیں کتاب بلوچستان ءِ درا کالج ءُُ یونیورسٹیانی لائبریری آنی تہا ایر کنگ بہ بنت تنکہ اے وڑیں کتاباں چہ طالب علم ءُُ پٹ ءُُ پولکار نپ ءُُ پائدگ چست کرت بکں انت۔
سینیٹر کبیر جان محمد شہی ءَ تران کناں ءَ گشت کہ ہر وھدے من لبزانکی ءُُ ادبی دیوانے ءَ بہر زوریں تہ منا باز وشی بیت۔ آئی ءَ گشت عمان ءُُ پاکستان دو ہمسائگیں ملک انت۔ آھانی تعلقداری بندات ءَ چہ باز شر انت۔ عمان ءِ گوں مکران ءُُ خاص گوادرے بلوچاں تعلقداری باز کہن ءُُ کدیم اِنت۔
عمان اے وھدی دنیا ءِ دیما شتگیں ملکانی تہا زانگ بیت عمان علم ءُُ زانت ءُُ جان سلامتی ءِ پڑ ءَ باز دیمروئی کرتگ۔ اے درا کریڈٹ عمان ءِ سلطان قابوس ءَ روت کہ آ یک ویژنری سروک ءِ جہت ءَ زانگ ءَ بیت۔ سلطان قابوس ءِ سروکی ءَ عمان ءِ تعقلداری گوں درائیں ملکاں شر انت۔ آئی ءَ گشت ہمے زوتاں آئی ءَ عمان ءِ تر ءُُ گرد کرتگ۔ اودا جاہ منندیں بلوچاں گوں آئی گنند ءُُ نند بوتگ کہ زند ءِ بازیں پڑ ءَ کار کنگ ءَ انت آئی ءَ یا رجان بادینی ءِ کتاب عمان ءِ بلوچ ءَ یک مزنیں جہد ءُُ کوشستے کرتگ کہ اے کتاب ءَ چہ عمان ءِ بلوچاں تاریخ دود ءُُ ربیدگ ءِ باروا بازیں معلومداری رست کنت۔ آئی ءَ گشت کہ من وتی عمان ءِ ترءُُ تاب ءِ وھدءَ عمان ءِ بلوچ ءِ کتاب ءَ عمان ءِ مجلس ءُُ سرکار ءِ مردمانی نیام ءَ بہر ءُُ بانگ کرتگ۔ آھان گشتگ کہ آ اے کتاب ءَ عربی ءُُ انگلش زبان ءَ رجانک کں انت۔ آئی ءَ گشتگ کہ اُمیت انت یار جان بادینی زیات ءَ چہ زیات پٹ ءُُ پول کنت ءُُ کتاب نبشتہ کنت آئی کتابانی دیمدرائی دیوان الم ءَ اسلام آباد ءَ برجم دارگ بیت۔
دیوان ءِ خاصیں مہمان اسلام آباد ءَ عمان ءِ سفیر شیخ محمد بن عمر بن احمد المرہوں ءَ گشتگ کہ پاکستان ءَ عمان ءِ تعقلداری سک محکم انت کہ آ وھد ءَ گوں ھوار زیات محکم بوھان انت۔ عمان ہما ملک انت کہ اودا ہچ قوم ے ءَ کم ٹک زانگ ءَ نہ بیت انچو عمان اودا مردمانی نیام ءَ ہچ وڑیں پرک ءُُ تپاوت نیست، عمان ءِ تہا درا مردم یک چم ءَ چارگ بنت۔
آئی ءَ گشت عمان ءِ دیمروئی ءِ تہا بلوچ یک مزنیں کردے پیش دشتگ انت۔ عمان ءِ تہا زند ءِ درائیں پڑاں بلوچ کار کنگا انت عمان ءِ دیمرئی ءِ بلوچانی کرد سہڑاھگ لوٹیت۔ من یار محمد بادینی ءِ منت واراں کہ آئی ءَ عمان ءِ بلوچ ءِ سرحال ءِ سرا اے کتاب نبشتہ کرتگ۔ اے کتاب ءَ عمان ءِ سلطان قابوس ءِ نام ءَ کرتگ اے کتاب ءَ چہ نہ ایوکا عمان ءِ تہا بلوچانی ھذت ءُُ شرف گیش بیت۔
بلکیں عمان ءِ پاکستان ءِ تعلقداری یک دومی ءَ نزدیک بنت ماں لوٹاں پاکستان ءُُ عمان ءِ نیامءَ دود ءُُ ربیدگ، با پار ءُُ تجارت زیات ءَ چہ گیش بہ بیت۔ من یک وارے پدا شمے درستاں منت واراں کہ شما منا اے خاصیں دیوان ءِ خاصیں مہمان ءِ شرف بخشات ءُُ منی گپاں گوں دلگوشی ءَ گوش داشت۔
دیوان ءِ گڈ سرا ”عمان ءِ بلوچ“ ءِ نبشتہ کار یار جان بادینی ءَ عمان، کویت، ماراکو، یمن، ترکمانستان ءُُ آزربائیجان ءِ سفیراں شکر ءُُ منت گپت کہ مروچی کتاب ءِ اے دیمدرائی دیوان ءَ ساڑی انت آئی ءَ گشت کہ منی بندات ءَ چہ اے واھگ بوتگ کہ دنیا ءِ بازیں ملکانی تہا جاہ منندیں بلوچانی باروا پٹ ءُُ پول بکنیں اے درگت ءَ من سال 1998 ءَ ترکمانستان ءَ شتگ رندءَ سال 1990 افریقہ ءَ شتگ رند ءَ قطر، بحرین، آمارت ءُُ عمان بلوچانی باروا کار کرتگ۔ منی اے دلی واھگ انت عمان ءِ بلوچ ءِ کتاب عربی ءَ رجانک کنگ بہ بیت۔ انچو اے کتاب ءِ دیمدردائی مسکت ءَ ایر کنگ بہ بیت۔
من عمان ء ِ سفیر ءَ چہ لوٹ انت کہ آ گوادر میوزیم ءِ باروا ھم دلگوش بدنت انت چیاکہ گوادر ءَ عمان ءِ دورے بازیں کلات ءُُ بازار است انت۔ گوادر ءُُ عمان ءِ تہذیب چہ سی پیک ءَ آماچ مہ بیت چیاکہ گوادرے شاہی بازار عمان ءِ دورے یک خاصیں نشانی ءِ انت اے نشانی گار مہ بیت آئی ءَ گڈ سرا پدا دیوان ءَ بہر زورکانی شکر ءُُ منت گپت۔
اے دیوان ءَ پروفیسر ڈاکٹر کلمکار کواس ءُُ زانتکارانی یک مزنیں تعدادے بہر زرت۔ دیوان ءِ گڈ سرا مہمانانی شرف ریفریشمنٹ دیگ بوت۔